XƏBƏRLƏR

2019-05-03

“İpək Yolunda Qobustan. İncilərin rəqsi” adlı geyim kolleksiyası nümayiş olunub

Bakı, 4 may, AZƏRTAC

“Qobustan” Milli Tarix-Bədii Qoruğunun təşkilatçılığı və Azərbaycan Dövlət Mədəniyyət və İncəsənət Universitetinin tərəfdaşlığı ilə Qobustan qoruğunda “İpək Yolunda Qobustan. İncilərin rəqsi” adlı geyim kolleksiyası nümayiş olunub.

Bu barədə AZƏRTAC-a “Qobustan” Milli Tarix - Bədii Qoruğunun direktoru Vüqar İsayev məlumat verib.

Bildirilib ki, universitetin rəssamlıq fakültəsinin dizayn və dekorativ tətbiqi sənət kafedrasının geyim dizaynı ixtisasının II, III və IV kurs tələbələrinin iştirakı ilə dosent Aysel Əzizovanın müəllifli olduğu, Qobustan qayaüstü təsvirlərinin motivləri əsasında hazırlanmış Çin geyim kolleksiyası, Osmanlı dövrünə aid geyim kolleksiyası, eyni zamanda, Azərbaycan milli geyim elementlərinə həsr olunmuş bir-birindən maraqlı geyim nümunələri təqdim olunub. 18-20 min il yaşı olan Qobustan qayaüstü təsvirlərini yeni konsepsiyada izləyiciyə çatdıran layihənin məqsədi Qobustanın mədəni irsinin təbliği ilə yanaşı, geniş auditoriyada bu mövzuya marağı artırmaqdır.

2019-04-18

Qobustan Milli Tarix Bədii qoruğunda Beynəlxalq Abidələr və Tarixi Yerlər Günü ilə əlaqədar sərgi təşkil olunmuşdur.

Beynəlxalq Abidələr və Tarixi Yerlər Günü ilə əlaqədar olaraq 18 aprel tarixində Qobustan Milli Tarix Bədii qoruğunda açıq qapı günü keçirilmişdir. Bu əlamətdar gün Tarixi Yerlər və Abidələrin Mühafizəsi Şurasının (İCOMOS) təklifi üzrə UNESCO tərəfindən 1983-cü ildə təsis olunub. Məqsəd insanların diqqətini abidələrin və tarixi yerlərin qorunmasına yönəltməkdir.

Bu günün məqsədinə müvafiq olaraq Mədəniyyət Nazirliyi, Mədəni İrsin Qorunması, İnkişafı və Bərpası üzrə Dövlət Xidməti və Memarlar İttifaqının dəstəyi ilə Qobustan Milli Tarix Bədii qoruğunda Qarabağın erməni işğalı altında qalan abidələri haqqında sərgi təşkil olunmuşdur. Sərgidə Qarabağda erməni vandalizminə məruz qalmış mədəni irsimiz: muzeylər, mədəniyyət evləri, məscidlər, qəbirlər, qədim alban memarlığı abidələri, arxeoloji abidələr, xalçalar və s. haqqında stendlər və videorolik nümayiş olunur.

Sərgi Qobustan abidələrini görməyə gələn ziyarətçilərin, xüsusilə xarici ziyarətçilərin marağına səbəb olmuşdur. Muzey əməkdaşları Qarabağ münaqişəsi və münaqişə nəticəsində vandalizmə qalmış mədəni irs abidələri, ümumilikdə Qarabağın maddi və mədəni irsi barədə ziyarətçilərə məlumat vermişlər.

2019-04-13

Qobustan Milli Tarix-Bədii Qoruğunda ağacəkmə aksiyası keçirildi

Aprelin 13-də Qobustan Milli Tarix-Bədii Qoruğunun təşkilatçılığı ilə Ekologiya və Təbii Sərvətlər Nazirliyinin “Bu yaz özün bir təbiət yarat” devizli yaz ağacəkmə kampaniyası çərçivəsində qoruq ərazisində ağacəkmə aksiyası həyata keçirildi.

Aksiya Mədəniyyət Nazirliyi və nazirliyin Mədəni İrsin Qorunması, İnkişafı və Bərpası üzrə Dövlət Xidmətinin dəstəyi ilə gerçəkləşdi.

Tədbirdə mədəniyyət naziri Əbülfəs Qarayev, ekologiya və təbii sərvətlər naziri Muxtar Babayev, Hesablama Palatasının sədri Vüqar Gülməmmədov, Qaradağ Rayon İcra Hakimiyyətinin başçısı Süleyman Mikayılov, Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov iştirak edirdi.

Mətbuat nümayəndələrinə açıqlama verən mədəniyyət naziri Əbülfəs Qarayev bu təşəbbüsün əhəmiyyətini yüksək qiymətləndirdi: “Qobustan tariximizin ən müqəddəs məkanlarından biridir. Bu gün Qobustan Milli Tarix-Bədii Qoruğunda kütləvi ağacəkmə aksiyası həyata keçirilir. Mədəniyyət Nazirliyi, Ekologiya və Təbii Sərvətlər Nazirliyi, eləcə də  Hesablama Palatasının əməkdaşları, mədəniyyət və incəsənət xadimləri bu aksiyada iştirak edir. Bildiyiniz kimi, Qobustan qoruğu 2007-ci ildə UNESCO-nun Dünya irsi siyahısına daxil edilib. Bu il UNESCO-nun Dünya İrs Komitəsinin 43-cü sessiyası Bakı şəhərində keçiriləcək. Bu münasibətlə Azərbaycana 3 mindən artıq qonağın gələcəyi nəzərdə tutulur. Onların ölkəmizdə UNESCO-nun Dünya irs siyahısına daxil olan abidlərlə tanışlığı da gözlənilir. Bunların sırasında Qobustan qoruğu da var”.

Əbülfəs Qarayev onu da diqqətə çatdırdı ki, Qobustan qoruğundakı muzey 2013-cü ildə Avropanın beş ən yaxşı muzeyi sırasına daxil olub. Bu muzeyin tikintisi Prezident İlham Əliyev və Birinci vitse-prezident Mehriban Əliyevanın təşəbbüsü ilə aparılıb, eləcə də qoruqda abadlıq işləri görülüb.

Nazir vurğuladı ki, xalqımızın böyük sərvəti olan Qobustanın qorunması, gələcək nəsillərə ötürülməsi bizim borcumuzdur.

Qobustan Milli Tarix-Bədii Qoruğunun direktoru ağacəkmə aksiyası haqqında məlumat verdi. Bildirdi ki, aksiya Ekologiya və Təbii Sərvətlər Nazirliyinin “Bu yaz özün bir təbiət yarat” devizi əsasında reallaşır. Qobustan qoruğunun Böyükdaş dağına gedən yolun sağ və sol tərəfində, 30 metr zolaqda yerli landşafta uyğun akasiya, badam, sərv, Eldar şamı və zeytun ağaclarının əkilir.

Qeyd edək ki, aksiyada ümumilikdə 3 mindən artıq ağac əkildi.

Tədbir iştirakçıları daha sonra qoruğun muzeyi ilə tanış oldular. 

2019-04-02

Qobustan Qoruğu əməkdaşlarının həmmüəllifi olduqları "Gobustan Rock Art Cultural Landscape (Azerbaijan)" adlı məqaləsi Qlobal Arxeologiya Ensiklopediyasında dərc olunub

Qobustan Milli Tarix-Bədii Qoruğunun əməkdaşları Sevinc Şirinli, Rəhman Abdullayev və İtaliyalı arxeoloq Dario Sigarinin birgə hazırladığı "Gobustan Rock Art Cultural Landscape (Azerbaijan)" adlı məqaləsi nüfuzlu beynəlxalq nəşriyyat olan "Springer" nəşriyyatının Qlobal Arxeologiya Ensiklopediyasında dərc olunub. Məqalədə müəlliflərin Qobustan qayaüstü təsvirləri haqqında tədqiqatları öz əksini tapıb.

2019-03-27

Novruz tətili günlərində Qobustan qoruğu xeyli turist qəbul edib.

Qobustan Milli Tarix-Bədii Qoruğunda Novruz bayramı münasibətilə bayram şənlikləri təşkil olunub. Bir neçə gün davam edən bayram proqramında açıq səma altında bayram yarmarkaları fəaliyyət göstərib. Novruz tətili ilə bağlı ziyarətçilərin gəlişində yaranan artımla əlaqədar xarici və yerli turistlərin istirahətini təmin etmək üçün Qobustan qoruğu kollektivi gücləndirilmiş iş şəraitində qonaqları qəbul edib.
Ziyarətçilərə qoruqda təşkil olunan yarmarkada çoxlu sayda milli təamlardan dadmaq, milli adət-ənənələrimizi, mədəniyyətimizi təbliğ edən müxtəlif geyim və suvenirlərlə tanış olmaq imkanı yaradılıb.
Bayram yarmarkası 26 mart tarixinədək turistləri qəbul edib.

2019-03-21

Qobustan Milli Tarix-Bədii Qoruğunun əməkdaşları Novruz bayramını qeyd edib.

Yazın gəlişi bir sıra xalqlarda yeni ilin başlanğıcı kimi qeyd olunmaqdadır. Təqvim üzərində ilin gəlişi 1 yanvar tarixinə təsadüf etsə də, təzə il öz qədəmlərini məhz mart ayının 21-də qoyur. "Novruz" xalqımızın milli adət-ənənələrini özündə saxlayan və nəsildən-nəslə ötürən ən gözəl bayramlarımızdandır. Bu münasibətlə Qobustan qoruğunda da bayram şənliyi təşkil olunub. Baharın ilk qədəmlərini Qobustanda qarşılayan qoruq kollektivi bir-birini təbrik edib, tonqal ətrafına toplaşaraq ən xoş arzularını bölüşüblər. 

Şənliyin təşkilində başda Qoruğun direktoru Vüqar İsayev olmaqla, əməyi keçən hər kəsə təşəkkürümüzü bildirir, xalqımızı bu əlamətdar bayram münasibətilə təbrik edirik.

2019-03-18

Sağlamlıq imkanları məhdud uşaqlar üçün Qobustan Qoruğunda Novruz şənliyi təşkil olunub.

Qaradağ rayon Sahil qəsəbəsində yerləşən Emin Quliyev adına Sağlamlıq İmkanları Məhdud Uşaqlar üçün 9 nömrəli xüsusi internat məktəbinin şagirdlərinə Qobustan qoruğunda bayram şənliyi təşkil olunub. Qonaqları qarşılayan Qobustan Milli Tarix-Bədii Qoruğunun direktoru Vüqar İsayev bayram münasibətilə onları təbrik edərək məktəblilərə ürək sözlərini bildirib. Müəllim heyəti ilə birgə Qoruğa dəvət olunan məktəbli qonaqlara Qoruq ərazisinə ekskursiya təşkil olunub. Qobustanın tarixi və mədəniyyəti, qayaüstü təsvirləri  və muzey ilə ətraflı tanışlıqdan sonra şagirdlər Novruzun gəlişi münasibətilə hazırlanmış bayram süfrəsinə dəvət olunub. Qonaqlarla xatirə şəkilləri çəkilib.

2019-03-16

Albaniyanın sabiq prezidenti Rexhep Meidani bu gün Qobustan Qoruğunu ziyarət edib.

14-16 mart tarixlərində Nizami Gəncəvi Beynəlxalq Mərkəzinin təşkilatçılığı ilə keçirilən VII Qlobal Bakı forumunda iştirak edən Albaniyanın eks-prezidenti bu gün Qobustanda olub. Qoruğu ziyarət edən R.Meidani bundan əvvəl də Azərbaycana gəldiyini, Bakı, Gəncə və Qəbələyə səyahət etdiyini bildirib. Əvvəlki səfərində Qobustanda olmasa da, lakin Qobustan qayaüstü təsvirləri haqqında dolğun məlumatlara sahib olması məlum olub.
R.Meidani Albaniya Azərbaycan arasındakı dostluq və siyasi-iqtisadi münasibətlərin tarixindən, ümummilli lider Heydər Əliyevlə yaxın münasibətlərindən də bəhs edib. Eks-prezidentlə xatirə şəkilləri çəkilib.

2019-03-13

Bosniya və Hersoqovinanın eks-prezidenti, Rəyasət Heyətinin sədri Mladen İvanıç Qobustan qoruğunu ziyarət edib

Qoruğu ziyarət edən M.İvanıç bu tarixi məkan haqqında təəssüratlarını bölüşdü. Əslində Bakıya forum üçün gəldiyini bildirən sədr 10 il əvvəl də Bakıda olduğunu, əvvəlki səfəri ilə indiki səfəri arasında gözlə görüləcək dərəcədə böyük inkişafın olduğunu qeyd edib. "Qobustan haqqında Xorvatiya Prezidentindən ilk dəfə məlumat almışdım. Azərbaycanda məhz belə bir qədim məkanın olduğunu öyrənəndə Bakıya səfərimdə mütləq bu ərazini ziyarət etməyi qarşıma məqsəd qoydum. Qobustan, həqiqətən də, heyrətamiz məkandır... Şərq ölkələrinə, xüsusilə də Azərbaycana xüsusi marağım var. Sizin adət-ənənələriniz diqqətimi hər zaman cəlb edib. İnsanlarınız qonaqpərvər və istiqanlıdır" - M.İvanıç bildirib.
Qoruğu ziyarət edib qayaüstü təsvirlərlə tanış olduqdan sonra M.İlanıç ilə xatirə şəkilləri çəkilib.